Gazetari Artan Hoxha ka deklaruar se zëvendëskryeministrja Belinda Balluku ndodhet në një situatë të vështirë dhe pa rrugëdalje, ndërsa hetimet e SPAK ndaj saj, sipas tij, janë ende në fazat e para. Ai i bëri këto komente gjatë një interviste në emisionin “Kjo Javë” në News24, ku analizoi zhvillimet e fundit politike dhe hetimore në vend.
Sipas Hoxhës, përmasat e çështjes janë të tilla që Balluku nuk mund të fshihet dhe askush nuk merr përsipër ta mbrojë. Ai theksoi se rasti ka marrë një dimension të madh, duke nënvizuar se kudo ku ajo shfaqet, situata bëhet edhe më e ndërlikuar. “Nuk ka ku të fshihet dhe askush nuk e merr përsipër ta mbrojë. Është një çështje kaq e madhe sa kudo që shkel ajo, pasojat janë të menjëhershme,” u shpreh gazetari, duke përdorur edhe metaforën e “elefantit në dyqanin e qelqurinave”.
Hoxha theksoi se ajo që është bërë publike deri tani përfaqëson vetëm fillimin e hetimeve dhe se zhvillimet në vijim pritet të jenë edhe më të rënda. Ai përmendi si shembull kontratat e termocentraleve lundruese në Vlorë, duke vënë në dukje se vetëm qiraja e tyre arrin rreth 90 mijë euro në ditë. Sipas tij, hetimet ende nuk kanë arritur në këtë fazë, duke lënë të kuptohet se objekti i tyre mund të zgjerohet ndjeshëm.
Në përfundim, Artan Hoxha e përshkroi situatën e Ballukut si një zgjedhje mes dy skenarëve ekstremë: përpjekja për të zvarritur situatën, që sipas tij e thellon edhe më shumë problemin, ose dorëzimi i menjëhershëm përballë drejtësisë, që do të sillte pasoja të rënda penale.