Këshilli Bashkiak i Lushnjës ka vendosur të heqë titullin “Qytetar Nderi” për ish-funksionarin e sistemit diktatorial, Gergji (Jergji) Velo, vetëm 86 ditë pasi ia kishte akorduar atë.
Vendimi është marrë pas daljes në dritë të dokumenteve arkivore, të cilat zbulojnë rolin e Velos në internimin e familjeve gjatë periudhës së komunizmit. Këto prova kanë nxitur reagime të forta publike dhe kanë vënë në pikëpyetje vendimin fillestar të Këshillit Bashkiak.
Heqja e titullit ka hapur një debat të gjerë në opinionin publik, duke rikthyer në vëmendje çështjen e kujtesës historike dhe respektit ndaj viktimave të diktaturës komuniste. Organizata të ish-të përndjekurve politikë dhe qytetarë të shumtë kanë kërkuar që figurat e lidhura me represionin e regjimit të mos nderohen me tituj publikë.
Këshilli Bashkiak i Lushnjës ka theksuar se vendimi synon korrigjimin e një gabimi dhe rikonfirmimin e angazhimit për të respektuar vuajtjet e familjeve të internuara dhe të përndjekura gjatë diktaturës.