Ndeshja e basketbollit mes Golden Eagle Yllit dhe KB Prishtinës është ndërprerë vetëm pas shtatë minutash lojë, si pasojë e incidenteve të shkaktuara nga tifozët e ekipit mysafir.
Tifozët e Prishtinës, të njohur si “Plisat”, hodhën sende në parket, çka detyroi gjyqtarët të pezullojnë përkohësisht zhvillimin e ndeshjes për arsye sigurie. Situata krijoi tension në palestër dhe bëri të pamundur vazhdimin normal të lojës.
Sipas burimeve, reagimi i tifozëve lidhet me pakënaqësinë ndaj vendimit të klubit të basketbollit Prishtina për të emëruar deputetin Bekë Berisha në postin e kryetarit të klubit. Ky vendim ka shkaktuar kundërshtime të forta nga një pjesë e mbështetësve të ekipit.
Ndërkohë, Ministria e Kulturës, Rinisë dhe Sportit ka shprehur kundërshtimin ndaj këtij emërimi. Mbetet të shihet se si do të zhvillohet situata në ditët në vijim dhe çfarë vendimesh do të merren lidhur me drejtimin e klubit dhe pasojat e ndërprerjes së ndeshjes.