Autoritetet iraniane po përballen me kritika ndërkombëtare për ndjekjen e mjekëve dhe punonjësve shëndetësorë që trajtuan protestuesit e plagosur gjatë shtypjes brutale të demonstratave anti-regjim. Sipas organizatave të të drejtave të njeriut, disa mjekë, përfshirë kirurgun Alireza Golchini, rrezikojnë dënime me vdekje.
Grupet e të drejtave të njeriut e përshkruajnë këtë si një fushatë të qëllimshme “hakmarrjeje” ndaj personelit mjekësor që refuzoi të injoronte gjendjen e protestuesve të plagosur rëndë, shumë prej të cilëve u qëlluan me armë ose u therën nga afër. Disa mjekë ngritën edhe qendra të improvizuara trajtimi.
Golchini, 52 vjeç nga Qazvin, u arrestua më 10 janar nga shtëpia e tij përpara gruas dhe djalit 11-vjeçar. Familjarët raportojnë se ai u rrah gjatë arrestimit dhe pësoi thyerje të krahut dhe brinjëve. Pak ditë më parë, ai kishte shpallur në rrjetet sociale numrin e tij për të ndihmuar protestuesit e plagosur, një praktikë që kishte ndjekur edhe gjatë lëvizjes “Gruaja, Jeta, Liria” në 2022.
Sipas Organizatës Iraniane për të Drejtat e Njeriut (IHRNGO), Golchini është një nga të paktën nëntë mjekë dhe vullnetarë të arrestuar javën e kaluar. Forcat e sigurisë kanë bastisur qendra mjekësore improvizuara dhe shtëpitë e tyre, pa dhënë informacion mbi vendndodhjen ose gjendjen e të arrestuarve. Avokati iranian Hossein Raesi e përshkruan këtë si një fushatë të qëllimshme hakmarrjeje ndaj mjekëve që nuk braktisin të plagosurit.
Autoritetet nuk kanë komentuar publikisht arrestimet ose akuzat, megjithatë kreu i gjyqësorit, Gholamhossein Mohseni Ejei, ka bërë thirrje për ashpërsi ndaj protestuesve, duke kërkuar që të mos tregohet “asnjë butësi” ndaj atyre që sipas tij rrezikojnë sigurinë publike.