Vatikani ka refuzuar ftesën e presidentit amerikan Donald Trump për t’iu bashkuar nismës së quajtur “Bordi i Paqes”. Lajmi është bërë i ditur nga Kardinali Pietro Parolin, sekretar i Shtetit i Selisë së Shenjtë, i cili u shpreh se Papa kishte disa shqetësime lidhur me iniciativën dhe, për këtë arsye, nuk do të marrë pjesë.
Sipas tij, një nga çështjet kryesore lidhet me rolin e komunitetit ndërkombëtar në menaxhimin e krizave. “Për ne ka disa pika kritike që duhet të sqarohen. Në nivel ndërkombëtar, mbi të gjitha duhet të jetë Organizata e Kombeve të Bashkuara ajo që administron situata të tilla krize. Kjo është një nga pikat ku kemi këmbëngulur,” deklaroi ai për mediat.
E përditshmja britanike The Independent shkruan se Trump u ka bërë ftesë disa liderëve botërorë për t’u përfshirë në këtë bord, i cili fillimisht ishte menduar si një mekanizëm për të mbikëqyrur armëpushimin në Gaza dhe për të koordinuar rindërtimin e territorit pas konfliktit mes Hamasit dhe Izraelit.
Më pas, sipas raportimit, qëllimi i nismës është zgjeruar, me Trump-in që ka deklaruar se bordi mund të shërbejë për adresimin e një sërë mosmarrëveshjesh globale. Megjithatë, disa vëzhgues e shohin këtë si një përpjekje për të krijuar një forum alternativ shumëpalësh ndaj OKB-së, institucion të cilin presidenti amerikan e ka kritikuar shpesh si joefektiv.