Këtë të enjte ka nisur muaji i shenjtë i Ramazanit, një nga periudhat më të rëndësishme për besimtarët myslimanë në mbarë botën. Muaji i nëntë i kalendarit islamik hënor përfaqëson kohën e agjërimit, përkushtimit dhe jetës shpirtërore.
Gjatë kësaj periudhe, besimtarët agjërojnë çdo ditë nga agimi deri në perëndim të diellit, duke hequr dorë nga ushqimi dhe pijet si shenjë sakrifice dhe devocioni. Krahas agjërimit, Ramazani shoqërohet me shtim të lutjeve, bamirësisë dhe ndihmës ndaj personave në nevojë.
Ky muaj konsiderohet edhe si një moment bashkimi familjar. Iftari, vakti i mbrëmjes kur prishet agjërimi, mbledh familjet rreth tryezës në një atmosferë solidariteti dhe mirënjohjeje.
Muaji i shenjtë do të përmbyllet me festën e Fitër Bajrami, që shënon përfundimin e agjërimit.
Autoritetet fetare u kanë bërë thirrje besimtarëve që këtë periudhë ta kalojnë me paqe, mirëkuptim dhe solidaritet, duke theksuar rëndësinë e vlerave shpirtërore dhe njerëzore që përcjell Ramazani.