Komanda Qendrore e Shteteve të Bashkuara, CENTCOM (United States Central Command), njoftoi se forcat amerikane kanë goditur më shumë se 5 mijë objektiva në Iran gjatë 10 ditëve të para të operacioneve ushtarake. Sipas autoriteteve amerikane, sulmet kanë pasur në shënjestër objekte që konsiderohen kërcënim për sigurinë dhe stabilitetin në rajon.
Në një deklaratë të publikuar në rrjetet sociale, CENTCOM theksoi se operacionet synojnë dobësimin e strukturave ushtarake dhe të sigurisë së regjimit iranian, duke goditur infrastrukturën strategjike dhe qendrat e komandës.
Operacioni, i quajtur “Epic Fury”, ka shkaktuar dëme të konsiderueshme edhe në flotën detare iraniane. Sipas të dhënave të komandës amerikane, më shumë se 50 anije iraniane janë dëmtuar ose shkatërruar gjatë këtyre sulmeve.
Në operacion janë përdorur bombardues strategjikë, avionë luftarakë, dronë, sisteme të mbrojtjes nga raketat dhe njësi detare, të mbështetura nga avionë furnizimi me karburant dhe mjete të avancuara mbikëqyrjeje.
Objektivat kryesore kanë përfshirë selinë e Gardës Revolucionare Islamike (IRGC), qendrat e komandës dhe kontrollit, sistemet e mbrojtjes ajrore, objektet e prodhimit të raketave balistike dhe dronëve, si dhe baza detare dhe raketore.
Tensionet në rajon janë përshkallëzuar që nga fundi i shkurtit, kur SHBA dhe Izraeli nisën sulme të koordinuara ndaj Iranit, duke rritur rrezikun e përhapjes së konfliktit në gjithë Lindjen e Mesme.