Një ngjarje tragjike ka tronditur Vjenën, ku një aksident i rëndë në një kantier ndërtimi ka shkaktuar vdekjen e katër personave, mes tyre edhe shtetas nga Kosova.
Ambasada e Kosovës në Austri ka konfirmuar edhe viktimën e tretë, Istref Zekaj, ndërsa më herët ishin identifikuar edhe Pajtim Bajrami dhe Asllan Musliu. Autoritetet janë ende në kontakt me familjarët dhe po ndjekin procedurat përkatëse.
Ngjarja ndodhi në distriktin Alsergrund, ku gjatë punimeve një strukturë betoni u shemb papritur, duke rrëzuar skelën ku ndodheshin punëtorët. Në momentin e aksidentit, pesë persona ndodheshin mbi konstruksion.
Ekipet e emergjencës, me mbi 100 pjesëtarë, ndërhynë në kushte të vështira për shkak të rrënojave dhe rrezikut nga shembje të tjera. Një punëtor u nxor i gjallë, por me lëndime të rënda, ndërsa katër të tjerët humbën jetën në vend.
Autoritetet austriake kanë nisur hetimet për të zbardhur shkaqet e aksidentit, ndërsa kjo tragjedi ka shkaktuar reagime dhe dhimbje të madhe në Kosovë.