Kombëtarja e Kosovës luan sonte një nga ndeshjet më të rëndësishme në historinë e saj, teksa përballet në transfertë me Sllovakinë në gjysmëfinalen e “play-off”-it për Kupën e Botës 2026.
Takimi do të zhvillohet në stadiumin “Tehelné pole” në Bratislavë, me fillim nga ora 20:45, në një sfidë ku është në lojë një biletë për në finale.
“Dardanët” vijnë në këtë përballje me moral të lartë dhe besim të madh, pas një periudhe përgatitjesh intensive dhe një atmosfere shumë pozitive brenda skuadrës. Stafi teknik e ka përgatitur ekipin në detaje për të përballuar një kundërshtar të fortë në shtëpinë e tij.
Sllovakia do të mbështetet te tifozët vendas, ndërsa Kosova synon të shfrytëzojë cilësinë individuale dhe organizimin në fushë për të bërë diferencën. Në stadium pritet të ketë edhe mbështetje të konsiderueshme për përfaqësuesen kosovare.
Fituesi i kësaj përballjeje do të sigurojë një vend në finale, ku do të përballet me Turqinë ose Rumaninë, duke qenë vetëm një hap larg realizimit të ëndrrës për pjesëmarrje në një Kupë Bote.