Shtetet e Bashkuara kanë njoftuar vendosjen e një bllokade ndaj të gjitha porteve dhe zonave bregdetare të Iranit, një veprim që ka shkaktuar ndërprerjen e trafikut detar në Ngushticën strategjike të Hormuzit.
Komanda Qendrore e ushtrisë amerikane (CENTCOM) bëri të ditur se bllokada do të hyjë në fuqi të hënën dhe do të zbatohet për të gjitha anijet që hyjnë ose dalin nga portet iraniane në Gjirin Arabik dhe Gjirin e Omanit.
Megjithatë, sipas njoftimit zyrtar, anijet që udhëtojnë mes porteve të vendeve të tjera do të lejohen të kalojnë përmes ngushticës, duke zbutur paralajmërimin e mëhershëm për një bllokim të plotë të kësaj rruge të rëndësishme detare.
Vendimi vjen pasi negociatat mes SHBA-së dhe Iranit për një armëpushim përfunduan pa marrëveshje, ndërsa autoritetet iraniane kanë paralajmëruar kundërpërgjigje ndaj kësaj mase.
Sipas të dhënave të monitorimit detar, trafiku në Ngushticën e Hormuzit kishte nisur të rikthehej gradualisht pas armëpushimit, por njoftimi për bllokadën ka bërë që lëvizja e anijeve të ndalet sërish. Para përshkallëzimit të konfliktit, në këtë rrugë ujore kalonin çdo ditë mbi 100 anije tregtare.