Bordi i Transparencës ka njoftuar një tjetër ndryshim të çmimeve të karburanteve, duke ulur çmimin e naftës me 13 lekë për litër dhe atë të benzinës me 2 lekë. Vendimi u mor në mbledhjen e datës 18 prill 2026 dhe hyni në fuqi po të njëjtën ditë në orën 10:30.
Sipas përcaktimeve të reja, çmimi maksimal i naftës (gazoil, standardi SSH EN 590) në shitje me pakicë do të jetë 197 lekë për litër, ndërsa në shumicë 185 lekë për litër. Ndërkohë, benzina do të tregtohet deri në 172 lekë për litër në pakicë dhe 160 lekë për litër në shumicë.
Megjithëse ulja e çmimit të naftës konsiderohet më e ndjeshme, reduktimi prej vetëm 2 lekësh për benzinën ka ngritur pikëpyetje mbi mënyrën e përllogaritjes së çmimeve dhe reflektimin real të tregjeve ndërkombëtare në tregun vendas. Vendimet e Bordit të Transparencës kanë qenë shpesh objekt debatesh, me kritika për mungesë transparence dhe ndikim të kufizuar në stabilizimin afatgjatë të çmimeve.
Autoritetet kanë paralajmëruar se çdo operator që nuk zbaton çmimet e vendosura rrezikon pezullimin e aktivitetit, duke theksuar edhe një herë rolin kontrollues të bordit në treg. Megjithatë, aktorë të tregut dhe ekspertë të ekonomisë kanë ngritur shqetësime mbi ndërhyrjet administrative në çmime, duke i konsideruar ato si masa që mund të shtrembërojnë konkurrencën.
Në një sqarim zyrtar, u theksua se çmimet aktuale janë nën pragjet e përcaktuara në Aktin Normativ nr. 1, datë 3 prill 2026, çka do të thotë se akciza do të vazhdojë të aplikohet në nivelin e plotë prej 100%. Ky element është parë gjithashtu si një faktor që kufizon uljen më të ndjeshme të çmimeve për konsumatorët.
Vendimi i radhës i Bordit pritet të shihet nëse do të sjellë një ndikim real në xhepat e qytetarëve apo do të mbetet një ndërhyrje e përkohshme në një treg që vazhdon të jetë i ndjeshëm ndaj luhatjeve dhe kritikave.