Ish-kryebashkiaku i Nju Jorkut, Eric Adams, është regjistruar zyrtarisht si banor në Tiranë, pasi më herët kishte marrë shtetësinë shqiptare. Lëvizja e tij ka tërhequr vëmendjen e mediave ndërkombëtare, përfshirë Politico.
Sipas raportimeve, autoritetet vendore nuk kanë konfirmuar nëse Adams do të jetojë realisht në Shqipëri, ndërsa burime pranë tij sugjerojnë se ky vendim lidhet kryesisht me interesa biznesi. Po ashtu, janë hedhur poshtë spekulimet për një përfshirje të tij në politikën lokale.
Adams u largua nga detyra në fund të vitit 2025, pas një mandati të shoqëruar me akuza për korrupsion. Ai ishte akuzuar për favore politike ndaj zyrtarëve të huaj në këmbim të përfitimeve personale, ndërsa çështja u mbyll më pas nga autoritetet amerikane.
Vizita e tij në Shqipëri në vitin 2025 dhe takimi me kryeministrin Edi Rama nxitën reagime, duke qenë se edhe ky i fundit përballet me akuza politike nga opozita për çështje korrupsioni.
Marrja e shtetësisë shqiptare nga Adams u bë me dekret të posaçëm nga Presidenti Bajram Begaj, ndërsa arsyet e këtij vendimi nuk janë bërë plotësisht publike.