SHBA – Shtëpia e Bardhë ka publikuar një imazh të presidentit amerikan, Donald Trump, duke mbajtur karta Uno, i shoqëruar me mesazhin “Unë i kam të gjitha kartat”, një gjest që po interpretohet si sinjal force ndaj Iranit në një periudhë tensionesh të rritura për programin bërthamor dhe situatën në Ngushticën e Hormuzit.
Pak orë më herët, Trump njoftoi në platformën Truth Social nisjen e një misioni për shoqërimin e anijeve në rajon, të cilin e quajti “Projekti Liria”. Ai theksoi gjithashtu se ka zhvilluar “biseda pozitive” me palën iraniane, pa dhënë detaje të mëtejshme.
Në deklaratat e tij publike, presidenti amerikan ka paralajmëruar se objektet bërthamore iraniane janë dëmtuar rëndë nga sulmet amerikane dhe se çdo tentativë për rifillimin e aktivitetit do të përballet me një përgjigje të fortë ushtarake.
“Ne i kemi të gjitha kartat, ata nuk kanë asnjë”, është shprehur Trump, duke theksuar se negociatat po zhvillohen nga një pozicion force.