Koloneli dhe ish-ministri i Brendshëm i Shqipërisë, Dritan Demiraj, ka reaguar pas propozimit të presidentit amerikan, Donald J. Trump, për emërimin e gjeneralit në pension Eric P. Wendt si ambasador të Shteteve të Bashkuara në Shqipëri.
Sipas Demirajt, ky emërim nuk është thjesht një zhvillim diplomatik, por një sinjal i fortë politik nga Uashingtoni për situatën në Shqipëri. Ai argumenton se profili i një gjenerali amerikan me përvojë në operacione të rëndësishme ushtarake dhe në fushën e sigurisë mund të ndikojë drejtpërdrejt në trajtimin e çështjeve të korrupsionit dhe të krimit të organizuar në vend.
Në reagimin e tij, Demiraj kritikon ashpër qeverisjen aktuale në Shqipëri, duke e akuzuar për korrupsion të lartë, manipulim të zgjedhjeve dhe lidhje të politikës me krimin e organizuar. Sipas tij, një ambasador me profil si Wendt mund ta trajtojë korrupsionin e nivelit të lartë jo thjesht si një çështje të brendshme politike, por si një faktor destabilizues për sigurinë dhe demokracinë.
Ish-ministri thekson gjithashtu se prania e një diplomati me këtë përvojë mund të rrisë vëmendjen ndërkombëtare ndaj standardeve demokratike, funksionimit të drejtësisë dhe transparencës në zgjedhje, duke kërkuar rezultate konkrete dhe jo vetëm deklarata politike.
Në analizën e tij, Demiraj e konsideron nominimin e Wendt edhe si një sinjal të një angazhimi më të fortë të Shteteve të Bashkuara në Ballkanin Perëndimor, në një kohë kur ndikimi i fuqive të tjera, si Rusia dhe Kina, në rajon është në rritje.
Në fund të reagimit, Demiraj shpreh respekt për karrierën ushtarake të gjeneralit Wendt, veçanërisht për drejtimin e operacioneve speciale në Afganistan gjatë viteve 2011–2012, duke theksuar se diaspora shqiptaro-amerikane mund të kontribuojë me ekspertizë në fushat e sigurisë dhe të luftës kundër krimit të organizuar, nëse kjo kërkohet nga ambasadori i ri.