Bayern Munich mbeti i zemëruar pas episodit të diskutueshëm në zonën e Paris Saint-Germain, ku lojtarët bavarezë kërkuan penallti për prekje të topit me dorë nga João Neves gjatë gjysmëfinales së Ligës së Kampionëve.
Situata ndodhi në minutën e 31-të, kur një top i larguar nga Vitinha përfundoi në krahun e mesfushorit portugez brenda zonës. Futbollistët e Bayernit protestuan menjëherë, duke kërkuar 11-metërsh, por gjyqtari lejoi vazhdimin e lojës dhe VAR-i nuk ndërhyri.
Sipas interpretimit të arbitrave, krahu i João Neves nuk ishte në pozicion të panatyrshëm dhe kontakti me topin nuk u konsiderua i qëllimshëm, çka bëri që episodi të mos cilësohej penallti.
Vendimi shkaktoi reagime të forta në kampin bavarez, me trajnerin Vincent Kompany që protestoi ashpër në vijën anësore, ndërsa Bayern mbeti i bindur se i ishte mohuar një penallti e pastër.