Irani i ka bërë thirrje të drejtpërdrejtë Shteteve të Bashkuara të tërhiqen nga rajoni, duke paralajmëruar se çdo bllokadë detare do të konsiderohet akt lufte dhe do të nxisë një përgjigje ushtarake të menjëhershme.
Këshilltari ushtarak i udhëheqësit suprem iranian, gjeneral major Mohsen Rezaei, një ish-komandant i lartë i Gardës Revolucionare, ka lëshuar deklarata të ashpra në televizionin shtetëror iranian, duke i bërë thirrje Uashingtonit të tërhiqë forcat e tij nga Gjiri Persik përpara se situata të dalë jashtë kontrollit.
“Këshilla ime ushtarake për SHBA-në është të tërhiqet përpara se Gjiri i Omanit të shndërrohet në një varrezë për anijet e saj. Përndryshe, ne e konsiderojmë një bllokadë detare një akt lufte dhe përgjigjja ndaj saj është e drejta jonë natyrore”, ka deklaruar Rezaei.
Zyrtari iranian ka sqaruar se durimi i Teheranit deri më tani nuk duhet të kuptohet si nënshtrim ndaj presionit amerikan. “Nëse kemi treguar durim deri më tani, kjo nuk do të thotë se e pranojmë atë”, tha ai.
Rezaei vuri në dyshim edhe arsyet e pranisë së vazhdueshme ushtarake të SHBA-së në Gjirin Persik, duke argumentuar se justifikimet historike për këtë prani nuk ekzistojnë më, ndërsa shtoi se Ngushtica e Hormuzit mbetet e hapur për tregti ndërkombëtare, por jo për lëvizje ushtarake që kërcënojnë stabilitetin e rajonit.