Kryetari i Partisë Demokratike të Kosovës, Bedri Hamza, ka deklaruar se për këtë parti çështja e presidentit tashmë është e mbyllur dhe nuk pritet asnjë ndryshim në qëndrim.
Para nisjes së seancës së jashtëzakonshme në Kuvend, ai theksoi se Partia Demokratike e Kosovës nuk e mbështet kandidaturën e Vjosa Osmanit, duke lënë të kuptohet se vendimi është përfundimtar.
Hamza u shpreh se përzgjedhja e presidentit duhet të vijë vetëm pas një marrëveshjeje politike mbi parimet bazë, ndërsa emrat duhet të diskutohen më pas. Ai shtoi se partia nuk e ka kushtëzuar kandidatin të jetë nga radhët e saj, por kërkon një proces konsensual.
Sipas tij, nëse sigurohen votat e nevojshme nga partitë e tjera, Osmani mund të rizgjidhet presidente edhe pa mbështetjen e Partisë Demokratike të Kosovës.