Një operacion i përbashkët ndërkombëtar, i zhvilluar nga autoritetet austriake dhe SPAK-u në Shqipëri, ka zbuluar një skemë të madhe mashtrimi online, e cila dyshohet se ka përfituar mbi 50 milionë euro nga qytetarë të ndryshëm evropianë.
Rrjeti kriminal, i bazuar në një strukturë “call center” në Tiranë, përdorte platforma investimi të rreme për të bindur viktimat të depozitonin shuma parash, duke u premtuar fitime të larta brenda një kohe të shkurtër.
Hetimet kanë zbuluar se në këtë skemë janë përdorur video dhe materiale të manipuluara me inteligjencë artificiale (deepfake), ku shfaqeshin figura publike të njohura. Ndër to ishte edhe futbollisti i Real Madrid, David Alaba, imazhi i të cilit është keqpërdorur për të rritur besueshmërinë e skemës.
Sipas autoriteteve, këto video të rreme krijonin përshtypjen se personazhe të njohur mbështesnin platforma investimi si “Lion-Trade”, duke i shtyrë viktimat të vepronin shpejt dhe pa verifikim.
Operacioni, i mbështetur edhe nga Europol, ka çuar në arrestimin e disa personave në Shqipëri, ndërsa hetimet vijojnë për të identifikuar të gjithë anëtarët e rrjetit dhe përmasat e plota të mashtrimit.