Presidenti amerikan Donald Trump i ka dhënë Iranit një afat të shkurtër për të arritur një marrëveshje diplomatike, duke paralajmëruar se në rast dështimi Teherani do të përballet me sulme të reja ushtarake. Duke folur para anëtarëve të Kongresit në Shtëpinë e Bardhë, Trump zbuloi se kishte qenë vetëm një orë larg nisjes së operacioneve ushtarake kundër Iranit, përpara se të vendoste të pezullonte përkohësisht sulmin pas kërkesave nga vendet e Gjirit.
“Ne do ta përfundojmë atë luftë shumë shpejt. Ata duan kaq shumë të bëjnë një marrëveshje. Janë të lodhur prej saj. Isha një orë larg. Ne ishim absolutisht të gatshëm. Do të ndodhte tani”, tha Trump.
Të hënën në mbrëmje, Trump mblodhi ekipin e lartë të sigurisë kombëtare, ku morën pjesë Zëvendëspresidenti J.D. Vance, Sekretari i Shtetit Marco Rubio, Sekretari i Mbrojtjes Pete Hegseth dhe Drejtori i CIA-s John Ratcliffe, ndër të tjerë. Takimi u përqendrua në opsionet ushtarake, përpjekjet e bllokuara diplomatike dhe planet për sulme të mundshme ndaj Teheranit.
Zëvendëspresidenti Vance u tregua më i rezervuar, duke pranuar se ka ende hapësirë për negociata, por duke vënë në dukje mosmarrëveshje të brendshme brenda udhëheqjes iraniane dhe paqartësi në pozicionin negociues të Teheranit.
Nga ana e saj, Teherani ka reaguar me tone të ashpra. Ministri i Jashtëm iranian Abbas Araghchi ka deklaruar se forcat iraniane ishin gati të shkaktojnë më shumë dëme nëse lufta do të rifillonte, duke pretenduar se avionët F-35 amerikanë mund të rrëzoheshin. Araghchi citoi gjithashtu një raport të Kongresit amerikan, sipas të cilit rreth 42 avionë dhe helikopterë amerikanë janë humbur ose dëmtuar që nga fillimi i operacionit të përbashkët SHBA-Izrael kundër Iranit në fund të shkurtit.