Ish-drejtuesi i Policisë në Qarkun e Shkodrës, Mithat Havari, ka denoncuar atë që e cilëson si presion ndaj punonjësve të administratës publike për të mos marrë pjesë ose për të mos mbështetur protestën e paralajmëruar nga opozita.
Përmes një reagimi publik, Havari shprehet se ka marrë një informacion të besueshëm sipas të cilit persona të caktuar, të cilët ai i quan njerëz të “mbretit lakuriq në detyrë”, kanë nisur të ushtrojnë presione ndaj administratës përmes patronazhistëve dhe personave të afërt me ta.
Sipas tij, qëllimi i këtyre veprimeve është pengimi i pjesëmarrjes së qytetarëve në protestën europiane, e cila, sipas Havarit, ka shqetësuar seriozisht qeverinë.
“Kjo është kambanë alarmi. Kush ka raste t’i denoncojë sa nuk është vonë”, shkruan Havari në mesazhin e tij.
Ish-drejtuesi i Policisë u ka bërë thirrje qytetarëve dhe punonjësve të administratës që të raportojnë çdo rast presioni apo intimidimi që mund të ushtrohet ndaj tyre lidhur me pjesëmarrjen në aktivitetet politike dhe qytetare.