Administrata e presidentit amerikan Donald Trump ka njoftuar se negociatat me Iranin për programin bërthamor janë ndër më të avanacuarat e viteve të fundit, duke i vlerësuar bisedimet si “90-95% të përfunduara”, por duke theksuar njëkohësisht se disa çështje kryesore mbeten ende të hapura.
“Nuk kemi arritur ende aty. Nuk do të nënshkruajmë marrëveshje sot apo nesër”, deklaroi një zyrtar i lartë i administratës më 24 maj, duke ftohur pritshmëritë për një zgjidhje të menjëhershme pavarësisht përparimit të dukshëm gjatë fundjavës.
Vetë Trump shkroi në platformën Truth Social se marrëveshja e re do të jetë ndryshe nga ajo e arritur në kohën e presidentit Obama, nga e cila u tërhoq gjatë mandatit të tij të parë. “Ndryshe nga ata para meje, unë nuk bëj marrëveshje të këqija”, theksoi ai.
Përparimi më i madh në negociata lidhet me rezervat e uraniumit iranian të pasuruar, që prej kohësh kanë qenë pengesa kryesore në bisedime. Sipas zyrtarëve amerikanë, Teherani ka rënë dakord “në parim” të heqë dorë nga rezervat e uraniumit pranë nivelit për armë bërthamore — aktualisht mbi 440 kilogramë të pasuruar në 60 për qind, vetëm një hap teknik larg nivelit për armë. Mënyrat e zbatimit dhe verifikimit janë ende në negocim, ndërsa burimet iraniane sugjerojnë si zgjidhje të mundshme hollimin e uraniumit nën mbikëqyrjen ndërkombëtare të agjencisë bërthamore të OKB-së.