Nga Enver Bytyçi
Kur Edi Rama hyri në godinën e Kryeministrisë në Tiranë, ai kishte me vete Baton Haxhiun dhe Shkëlzen Maliqin. Shkëlzeni nuk qëndroi shumë pranë tij. Arsyen e di vetëm ai dhe, nëse është i pastër në figurën dhe qëndrimet e tij, duhet ta bëjë publike. Pra, pse u largua aq shpejt prej Edi Ramës dhe, madje, të shpjegojë edhe pse i besoi në fillim dhe shkoi pranë tij? Baton Haxhiu është ende pranë Edi Ramës, edhe në mos me zyrë të posaçme në Kryeministri, në studion e Fevzos dhe në studiot e tjera televizive të Tiranës. Nuk ndahet nga Edi Rama.
Por jo vetëm kaq. Baton Haxhiu ishte shumë aktiv, sidomos gjatë kontakteve të Edi Ramës me presidentin e Serbisë, Aleksandër Vuçiqin. Aktiv jo thjesht sepse shoqëronte shefin e tij në ato vizita dhe kontakte, por edhe sepse parapërgatiste të gjithë axhendën e takimeve, bisedimeve, veprimtarive, akomodimeve, shoqërimeve dhe punëve të tjera të pista të kryeministrit të Shqipërisë në bashkëpunim me presidentin e Serbisë. Të gjithë e kemi parë sa i afërt ishte Batoni me Aleksandër Vuçiqin dhe çfarë përzemërsie tregonte ky i fundit për njeriun e tij pranë kryeministrit të Shqipërisë. Edi Rama është shoqëruar vazhdimisht dhe në çdo hap nga Baton Haxhiu në marrëdhëniet e tij me Serbinë dhe Beogradin. Rastësi apo domosdoshmëri? Në politikë dhe diplomaci asgjë nuk ndodh rastësisht.
Shpeshherë thuhet se Batoni është mik i Devollëve dhe se Devollët kanë ndërmjetësuar te Edi Rama që Batoni të jetë krahu i djathtë i kryeministrit të Shqipërisë. Në të vërtetë, Devollët janë pranë Ramës dhe pranë Batonit, sepse ata kanë lidhje të ngushta jo vetëm në biznes me Beogradin dhe me Serbinë, por edhe me institucionet e saj. Aq i ngushtë është ky bashkëpunim, sa edhe televizioni i Devollëve në Kosovë është regjistruar në Serbi, me seli në qytetin Peç, domethënë në Pejë, që në serbisht quhet Peç. Sërish them se nuk është rastësi që Devollët, të reklamuar tashmë si të licencuar nga Serbia, të jenë njëkohësisht miq të Edi Ramës dhe Baton Haxhiut. Por ne e dimë se këta Devollë janë edhe miq të disa politikanëve opozitarë në Kosovë dhe, sërish, nuk është rastësi që edhe këta politikanë opozitarë të Kosovës janë gjithashtu miq të Edi Ramës.
Për ta thelluar argumentin se kryeministri shqiptar është i rrethuar nga njerëzit e Serbisë, po përmend edhe një fakt tjetër shumë interesant. Kur Vjosa Osmani dhe Albin Kurti morën, përkatësisht, postet e presidentes dhe të kryeministrit, ata e shkarkuan nga detyra inspektoren e përgjithshme të AKI-së së Kosovës, Vlora Hysenin, madje me dyshimin se ajo u kishte dhënë informacione për dokumente sekrete shërbimeve të Serbisë. Akoma pa kaluar një javë apo një muaj, pa u thelluar në informacione konkrete dhe pa pyetur presidenten dhe kryeministrin e Kosovës, Edi Rama e emëroi Vlora Hysenin në krye të shërbimit informativ të Shqipërisë. Pse dhe si ndodhi kjo? Si mundet që kryeministri i Shqipërisë ta marrë dhe ta vendosë në krye të shërbimit sekret të vendit të tij një person të dyshuar për lidhje sekrete me Serbinë?
Çdo mendje e kthjellët dhe e pandikuar nga propaganda dhe demagogjia do ta besonte se kjo ka ndodhur me porosi të Beogradit. Ka shumë indicie, sipas të cilave Vlora Hyseni është ngritur në atë detyrë me vullnetin e përbashkët të Edi Ramës dhe Aleksandër Vuçiqit. Ka pasur akuza nga opozita se Vlora Hyseni i shet Serbisë informacione të klasifikuara për Shqipërinë dhe se ajo ka bërë vizita sekrete në Beograd. Nuk dihet nëse këto vizita kanë shërbyer për të transmetuar mesazhe midis dy liderëve përkatës apo për bashkërendimin e veprimtarisë së dy ndërmarrjeve kriminale e mafioze, asaj të Tiranës dhe të Beogradit. Ka shumë pikëpyetje dhe pikëçuditëse se pse një person i shkarkuar në Kosovë, pas disa ditësh, merr detyrën më të lartë në Shqipëri. Por ajo që i bashkon të gjitha këto pikëpyetje lidhet me faktin se kryeministri i Shqipërisë ka qenë dhe vazhdon të jetë i rrethuar me njerëz që janë në shërbim të Serbisë ose, së paku, që dyshohen fort dhe në mënyrë logjike se janë të tillë.
Në rolin e këtyre emrave që përmenda më lart janë edhe personazhe të tjerë nga Kosova. Kam shumë dëshirë të besoj se këta, qofshin politikanë, intelektualë apo njerëz të mediave, janë pozicionuar pro Ramës për inat të Albin Kurtit. Por jam i bindur se ndër ta ka edhe të tillë që kanë marrë një rol të caktuar në përpjekjet që Serbia bën për ta përçarë politikën shqiptare, sidomos atë të Shqipërisë dhe të Kosovës.
Kam korrigjuar drejtshkrimin, pikësimin, përdorimin e presjeve, trajtat gramatikore dhe disa formulime stilistike për rrjedhshmëri, duke ruajtur përmbajtjen dhe qëndrimin e autorit.