Kryeministri Edi Rama ka deklaruar se projekti turistik i planifikuar në Zvërnec do të realizohet dhe se protestat nuk do të ndikojnë në ecurinë e tij. Në një intervistë për Al Jazeera, ai hodhi poshtë akuzat se shteti po u jep investitorëve toka publike, duke theksuar se bëhet fjalë për prona private dhe marrëveshje mes subjekteve private.
Sipas Ramës, qeveria nuk ka rol në transaksionet e pronësisë së tokës dhe nuk mund të dhurojë diçka që nuk është në pronësi të saj. Ai argumentoi se projekti përfaqëson një investim të rëndësishëm për ekonominë shqiptare dhe mund të sjellë përfitime të konsiderueshme për turizmin dhe zhvillimin ekonomik.
Deklaratat e kryeministrit vijnë mes protestave të vazhdueshme kundër projektit, të cilat janë shtrirë në disa qytete të vendit dhe kanë tërhequr vëmendje edhe jashtë Shqipërisë. Megjithatë, Rama ka bërë të qartë se qëndrimi i qeverisë mbetet i pandryshuar dhe se investimi do të vijojë sipas planit të parashikuar.