Kryeministri Edi Rama ka vijuar mbrojtjen publike të projektit turistik në Zvërnec, duke e krahasuar atë me resortin e njohur Costa Navarino në Greqi, një investim që, sipas tij, u kundërshtua ashpër në fillim, por që sot konsiderohet një histori suksesi.
Në një postim në rrjetet sociale, Rama kujtoi se projekti grek u përball me protesta, peticione dhe paralajmërime për dëme të pariparueshme mjedisore. Sipas tij, kundërshtarët e kohës parashikonin shkatërrimin e natyrës, humbjen e biodiversitetit dhe betonizimin e një prej zonave më të bukura të Mesdheut.
Megjithatë, kreu i qeverisë theksoi se realiteti rezultoi ndryshe. Sot, Costa Navarino renditet ndër destinacionet turistike më prestigjioze në Europë, duke gjeneruar mijëra vende pune, të ardhura të konsiderueshme për ekonominë dhe zhvillim për bizneset lokale.
Rama argumentoi se zhvillimi nuk duhet refuzuar apriori dhe se projektet e mëdha duhen gjykuar mbi bazën e rezultateve dhe standardeve që ofrojnë. Ai shtoi se Shqipëria ka potencialin të krijojë një destinacion të ngjashëm në Zvërnec, duke e cilësuar projektin si një mundësi për ta kthyer zonën në një pikë referimi të turizmit mesdhetar.
Sipas Ramës, përvoja e Costa Navarinos dëshmon se vizioni, investimi dhe menaxhimi i përgjegjshëm mund të transformojnë një zonë me potencial në një destinacion turistik të njohur ndërkombëtarisht.