Ish-futbollisti i Real Madridit, Steve McManaman, ka komentuar situatën në klub pas eliminimit nga Bayern Munich në çerekfinalen e UEFA Champions League, duke theksuar se problemi kryesor lidhet me fuqinë që kanë lojtarët brenda skuadrës.
Anglezi, i cili luajti për Real Madridin nga viti 1999 deri në 2003, deklaroi se në klubin madrilen pushteti real nuk është gjithmonë në duart e trajnerit, por shpesh në ato të futbollistëve.
Sipas tij, kjo është arsyeja kryesore e shumë problemeve që shfaqen në ekip.
“Një lojtar te Real Madridi ka një fuqi të jashtëzakonshme. Mendoj se ky është thelbi i problemit”, u shpreh McManaman, i cili gjatë karrierës ka luajtur edhe për Liverpool FC dhe Manchester City.
Ai bëri krahasime me klube të tjera të mëdha europiane, duke theksuar se në Liverpool FC drejtimin e ka trajneri Arne Slot, ndërsa te Manchester City vendimmarrja është në dorën e trajnerit Pep Guardiola. Ndërsa, sipas tij, te Real Madridi shpesh janë lojtarët ata që përcaktojnë në praktikë mënyrën se si luan skuadra në fushë.
McManaman theksoi se një trajner duhet të gjejë balancën mes autoritetit dhe marrëdhënies me lojtarët, në mënyrë që të gjithë të ndihen pjesë e ekipit dhe të performojnë në nivel të lartë.
Sipas tij, çelësi është që lojtarët të ndihen mirë dhe të shijojnë stërvitjen, pa u ngarkuar me tepër analiza taktike apo video.
Ish-mesfushori përmendi si shembuj të trajnerëve që kanë arritur të krijojnë këtë ekuilibër te Real Madridi emra si Carlo Ancelotti dhe Vicente del Bosque.
Në fund, ai komentoi edhe trajnerin spanjoll Xabi Alonso, duke thënë se nuk e sheh atë si një trajner shumë autoritar dhe se përpjekja e tij për të sjellë stilin e lojës që përdori te Bayer Leverkusen nuk është pranuar plotësisht nga lojtarët e Real Madridit.