Protesta e djeshme në Tiranë ka vijuar të tërheqë vëmendje të gjerë në rrjetet sociale, ku qarkullojnë dhjetëra pamje nga pjesëmarrja e lartë e qytetarëve në bulevardin “Dëshmorët e Kombit”.
Mes atyre që kanë reaguar është edhe Besiana Kadare, vajza e shkrimtarit të njohur Ismail Kadare, e cila ka shpërndarë në rrjetet sociale pamje nga protesta dhe sheshi i mbushur me mijëra qytetarë.
Postimi i saj vjen në një moment kur protestat kundër qeverisë dhe projektit të Zvërnecit kanë hyrë në ditën e njëmbëdhjetë, duke mbledhur çdo mbrëmje pjesëmarrës nga qytete të ndryshme të vendit.
Qytetarët e pranishëm në protestë kanë kërkuar largimin e kryeministrit Edi Rama dhe të qeverisë, ndërsa kanë shprehur pakënaqësinë e tyre përmes pankartave, thirrjeve dhe mesazheve publike.
E nisur fillimisht si një kundërshtim ndaj projektit në Zvërnec, protesta është shndërruar në një lëvizje më të gjerë qytetare me kërkesa politike për ndryshim dhe reformim të sistemit qeverisës.