Kryeministri Edi Rama deklaroi se investimi i madh turistik i planifikuar në Zvërnec nuk ndikohet nga hetimet e SPAK dhe shpallja në kërkim e Artur Shehut.
I pyetur për zhvillimet e fundit, Rama tha se procedimet penale ndaj personave të përfshirë në shitjen e pronave janë të ndara nga statusi aktual i tokave, të cilat sipas tij u përkasin ligjërisht blerësve. Ai theksoi se çdo pretendim për pronësinë do të duhet të zgjidhet nga gjykata.
Sipas kryeministrit, projekti nuk përballet me asnjë pengesë ligjore dhe mbetet në proces zhvillimi. Rama argumentoi se një investim i tillë është i rëndësishëm për ekonominë dhe zhvillimin e zonës, duke shtuar se Vlora e mbështet këtë projekt.
Ai sqaroi gjithashtu se deri më tani nuk është dhënë leje ndërtimi për investimin, por vetëm një leje zhvillimi, e cila përbën miratimin paraprak të konceptit. Sipas Ramës, hetimet e SPAK do të vijojnë në mënyrë të pavarur, ndërsa investimi nuk preket nga ky proces.