Kosova ka hyrë në një fazë vendimtare politike, pasi deputetët kanë vetëm dy javë kohë për të zgjedhur presidentin e ri të vendit. Nëse deri më 28 prill nuk arrihet një marrëveshje në Kuvend, vendi rrezikon të shkojë sërish në zgjedhje parlamentare, për herë të tretë brenda një viti e gjysmë.
Për momentin, partitë politike duken ende larg një dakordësie përfundimtare. Opozita akuzon Lëvizjen Vetëvendosje në pushtet se nuk po tregon vullnet për të zgjedhur presidentin, ndërsa kjo e fundit i kritikon partitë opozitare për mungesë propozimesh konkrete.
Sekretarja e Përgjithshme e Partisë Demokratike të Kosovës, Vlora Çitaku, ka deklaruar se nëse Vetëvendosje nuk është e interesuar për një marrëveshje me PDK-në, atëherë duhet të gjejë zgjidhje me deputetët e partive të tjera. Sipas saj, kryeministri Albin Kurti ende nuk i është përgjigjur kërkesës së PDK-së që çdo takim mes liderëve të paraprihet nga një kërkesë zyrtare me shkrim.
Pas konstituimit të Kuvendit, Kurti ka zhvilluar disa takime me kryetarin e PDK-së, Bedri Hamza, por takime të tilla nuk kanë vazhduar pas vendimit të fundit të Gjykatës Kushtetuese të Kosovës lidhur me çështjen e presidentit.
Ndërkohë, kreu i qeverisë është takuar disa herë edhe me kryetarin e Lidhjes Demokratike të Kosovës, Lumir Abdixhiku. Ky i fundit ka theksuar se kërkon një marrëveshje më të gjerë politike dhe se nuk mbështet asnjërin nga dy kandidatët e propozuar nga Vetëvendosje për president.
Deputeti i LDK-së, Armend Zemaj, ka deklaruar se mungon vullneti politik nga shumica parlamentare për të gjetur një zgjidhje.
Nga ana tjetër, shefja e Grupit Parlamentar të Vetëvendosjes, Arbërie Nagavci, është shprehur se kryeministri Kurti po punon për të arritur një marrëveshje që do të shmangte zgjedhjet e parakohshme.
Me afrimin e afatit, presioni politik po rritet dhe mbetet për t’u parë nëse partitë do të arrijnë kompromis për zgjedhjen e presidentit, apo vendi do të përballet sërish me zgjedhje të reja parlamentare.